SEC. COLOMA: Magandang umaga, Rey, sa iyo at sa lahat ng ating tagapakinig.

SAMPANG: Opo. Maraming salamat pong muli, Secretary. Alam kong busy po kayo, at maraming salamat po sa muli po ninyong pagpapaunlak sa ating programa ngayong araw na ito ng Sunday. Sec., may message ka ba? May opening statement po ba kayo, Secretary?

SEC. COLOMA: Mayroon tayong maikling opening statement. Malinaw ba ang dating natin ngayon?

SAMPANG: Malinaw naman po, Sec.

SEC. COLOMA: Ito po ano, ito po ay hinggil sa pagdiriwang ng International Women’s Day at International Women’s Month.

Nakikiisa ang pamahalaan sa buong mundo sa mahalagang papel at kontribusyon ng kababaihan sa ating lipunan ‘di lamang bilang ilaw ng ating mga tahanan, kung hindi bilang isang matatag na haligi sa patuloy na pag-angat ng ating ekonomiya sa ating pagdiriwang ng Pandaigdigang Araw ng Kababaihan sa darating na Martes, Marso a-otso. Ang Marso ang siyang itinakdang buwan ng kababaihan sa Pilipinas alinsunod sa Republic Act 6949.

Muling pangungunahan ng Philippine Commission on Women ang pagsasagawa ng mga aktibidad at gawain na sumusunod sa temang, “Kapakanan ni Juana, Isama sa Agenda”. Ang tema ay isang panawagan upang itaguyod ang ‘gender equality’ at maayos na pagkakatawan sa mga kababaihan sa mga posisyon ng pamumuno at pagbalangkas sa mga desisyon at polisiya sa publiko man o pribadong sektor, pagsasama sa interes ng kababaihan sa plataporma ng mga namumuno at pagbibigay ng karampatang tulong at ayuda sa mga kababaihan upang matamo ang kanilang adhikain sa buhay.

Sa nakalipas na limang taon, isa sa mga mahahalagang haligi ng programa sa kagalingang panlipunan ng pamahalaan ang pagtataguyod ng pagkakapantay ng kasarian o gender equality batay sa prinsipyong nakapaloob sa Republic Act 9710, enacted in 2008 o ang Magna Carta of Women.

Sa ipinalabas na 2015 Global Gender Gap Report ng World Economic Forum noong Nobyembre, nasa ikapitong puwesto ang Pilipinas at kaisa-isang bansa mula sa Asya mula sa kabuuang isandaan at apatnapu’t limang bansa (145) sa buong mundo pagdating sa gender equality at pagbibigay ng oportunidad sa mga kababaihan sa apat na aspeto: economic participation, educational attainment, health and survival at political empowerment.

Iyan po ang ating pahayag hinggil sa pagdiriwang ng Araw at Buwan ng mga Kababaihan.

SAMPANG: Maraming salamat po, Secretary Coloma, sa inyong opening statement para sa araw na ito. Sec., magpo-proceed na po ako sa mga questions mula sa ating Malacañang Press Corps.

SEC. COLOMA: Go ahead, Rey.

SAMPANG: Hinihingi po ang reaksiyon ng Palasyo sa naging statement ni Vice Presidential candidate Chiz Escudero. Ito pong si Pangulong Aquino ay dapat mag-focus na lamang po sa fair polls instead na mag-campaign para sa mga Liberal Party candidates, Secretary.
SEC. COLOMA: Ito po ano, sa wikang Ingles: President Aquino is actively campaigning for the candidates of the Daang Matuwid Coalition because he believes it is his duty to our bosses, the Filipino people, to ensure the continuity of good governance that is essential to the attainment of inclusive growth for future generations of Filipinos. He is also determined to ensure the conduct of fair and credible elections by respecting the independence of the Comelec.

Kaisa po si Pangulong Aquino at ang buong pamahalaan sa pagnanais na magkaroon ng maayos, malinis, mapayapang halalan sa darating na Mayo. Ang paglahok ng Pangulo sa kampanya ay bahagi ng kaniyang nais na maipagpatuloy at maisulong ang mga nasimulang reporma at programang pangkaunlaran na siya ring prinsipyo at adhikaing isinasabuhay ng mga kandidato ng Kowalisyon ng Daang Matuwid sa pamumuno nina Secretary Roxas at Representative Robredo.

SAMPANG: Ang ikalawang tanong po, Secretary. Ito raw pong mga pamilya ng Special Action Force o iyong 44 members ay nag-express daw po ng concern na itong katarungan o justice ay hindi nila makakamit laban dito sa mga responsable sa pagkamatay ng mga police commandos matapos hindi makamit ng Department of Justice iyong deadline para ma-resolve iyong criminal charges laban sa mga miyembro ng MILF, BIFF at iba pang mga armadong grupo, Secretary.

SEC. COLOMA: Hindi tumitigil at masinsing tinututukan pa rin ng pamahalaan ang pagbibigay ng karampatang hustisya sa mga pamilya at kaanak ng mga kasapi ng SAF 44. Sa ating natunghayang pahayag ni Secretary Emmanuel Caparas, sinisiguro niya ang paglalabas ng kaukulang resolusyon hinggil sa inihaing criminal charges laban sa ilang miyembro ng Bangsamoro Islamic Freedom Fighters (BIFF) at iba pang private armed groups or PAGs. Marapat na bigyan natin ng sapat na pagkakataon at panahon ang DOJ upang matiyak ang katibayan at kaayusan ng binabalangkas na resolusyon.

SAMPANG: All right. Secretary, for today, iyon lamang po iyong mga questions mula sa ating Malacañang Press Corps, not unless mayroon pa ho kayong ibang mensahe na gustong iparating sa ating mga kababayan, Secretary.

SEC. COLOMA: Sapat na siguro iyon for now, Rey. Anyway, kung mayroon pa silang gustong itanong for the rest of the day ay batid naman nila ang paraan kung paano tayo makakasagot sa kanila. Maraming salamat muli sa pagkakataon, Rey.

SAMPANG: Maraming salamat din po. Ang ating butihing Kalihim, Secretary Sonny Coloma ng Presidential Communications Operations Office.