SEC. COLOMA: Magandang umaga sa iyo, Rey.

SAMPANG: Good morning po, Sec. Thank you very po ulit. Sec., baka mayroon po kayong opening statement para sa ating mga kababayan.

SEC. COLOMA: Uulitin ko lang iyong panawagan kahapon ni Undersecretary Manolo Quezon sa kaniyang pakikipanayam sa mga kagawad ng Malacañang Press Corps na kung saan ay nanawagan siya at nananawagan din ako ngayon sa ating mga kababayan na tutukan, pakinggan at lumahok doon sa isasagawang town hall na presidential debate sa Dagupan City, Pangasinan ngayong hapon. Ayon sa ulat, ang format ng presidential debate ay town hall, tatanggap ng tanong mula sa iba’t ibang sektor ng ating lipunan kaya’t may pagkakataon ang ating mga mamamayan na suriin ang paninindigan at posisyon ng mga kandidato sa pagkapangulo sa isang kakaibang format o paraan. Hindi lamang iyong mga maiikling tugon, umaasa tayo na mas magiging kumpleto iyong mga paliwanag at paglalahad ng posisyon ng ating mga kandidato sa pagkapangulo, Rey.

SAMPANG: Opo. At sigurado, Secretary, nakatutok po ang ating mga kababayan diyan at hihimayin nila ‘no. Sana nga po, Secretary, hindi lang iyong mga sinasabi ng mga kandidato kung hindi pati iyong pagkatao, iyong buong personalidad ay hihimay-himayin din.

SEC. COLOMA: Mainam nga na ganiyan ang maganap, Rey, sapagka’t napakahalaga ng pagpapasya ng ating mga kababayan para sa pinakamataas na posisyon sa ating bansa – iyong pagkapangulo.

SAMPANG: Opo. Secretary, diretso na po ako, tuloy na po ako sa mga katanungan mula sa ating mga kasamahan sa Malacañang Press Corps. Isang katanungan po, unang katanungan: Kumpiyansa pa rin po ba ang Malacañang sa kakayahan ng Comelec o ng ating poll body sa gaganaping eleksiyon? Ito raw po ay matapos iyong insidente ng data security breach sa website ng Comelec at ilang mga glitches pa raw po nang magsagawa ng mass elections sa ilang lugar noong isang araw, Secretary.

SEC. COLOMA: Tungkulin ng Commission on Elections na tiyakin ang integridad at kaayusan ng darating na halalan. Tiwala ang pamahalaan na isinasagawa ng Comelec ang mga nararapat na hakbang upang higit pang maging matibay ang integridad ng automated election system na gagamitin sa pambansang eleksiyon sa ika-9 ng Mayo.

Kahapon ay nagsagawa muli ang Comelec ng simulasyon ng aktuwal na halalan o ‘mock elections’ upang agad na matukoy at matugunan ang posibleng maganap na aberya sa mismong araw ng halalan. Ayon sa ating mga natunghayang ulat, naging matagumpay sa pangkalahatan ang isinagawang mock elections at maayos na naipadala ang mga boto mula sa mga nakilahok na polling precinct papunta sa mga canvassing centers. Tungkulin nating lahat na pagtulungan ang pagdaraos ng isang mapayapa, maayos at may integridad na pambansang halalan.

SAMPANG: Ang susunod pong katanungan, Secretary Coloma, nagpahayag po kasi ang grupong Bayan na ituon na lamang daw po ng Pangulong Aquino iyong kaniyang atensiyon sa mga problema ng bansa, tulad po ng epekto ng El Niño, kaysa sa pangangampanya niya para sa mga administration candidates. Ano raw po reaksiyon ng Palasyo dito, Secretary?

SEC. COLOMA: Sa lahat ng pagkakataon, ang pangunahing prayoridad ni Pangulong Aquino ay ang masinsing pagtutok sa lahat ng kaganapang may kinalaman sa pambansang interes at ang pagtataguyod ng kabutihan ng aming mga ‘boss’ – ang sambayanang Pilipino. Mahigpit niyang sinusubaybayan ang pagpapatupad sa mga programa at proyektong isinasagawa ng Gabinete na nakapaloob sa pinaiiral na Roadmap to Address the Impact of El Niño o RAIN. Bukod dito ay tinututukan din ng Pangulo ang iba pang mga mahahalagang kaganapan na mayroong malaking impact o epekto sa buhay ng ating mga mamamayan – iyong sa kabuhayan, iyong sa pambansang seguridad, sa pakikipag-ugnayan natin sa iba’t ibang bansa, at sa pagtitiyak na magkaroon tayo ng maayos na halalan.

Kung sa partikular na aspeto ng El Niño, mayroong pinapatupad ang Gabinete na Roadmap to Address the Impact of El Niño o RAIN, at sakop nito ang lahat ng aspeto pati iyong pagtulong sa mga magsasaka ng Department of Agriculture, iyong pagtiyak sa kasapatan ng safe drinking water na isinasagawa ng Department of Health. Iyon namang DTI ay tinututukan iyong maayos na supply at distribution ng mga pagkain. Samantalang ang DSWD naman ay patuloy na namamahagi ng family food packs at nagpapatupad ng Cash-for-Work Program para sa kapakanan ng mga pamilyang lubhang apektado ng El Niño. Tumutulong din diyan ang DOLE, NIA at TESDA.

Hinggil naman sa paglahok ng Pangulo sa kampanya, matibay ang paniniwala ni Pangulong Aquino na responsibilidad niya na siguruhing maipagpapatuloy ang mga reporma’t programang pangkaunlarang ating tinatamasa sa pamamagitan ng pagkampanya sa mga kandidatong magsasabuhay sa prinsipyo ng Daang Matuwid. Kaya’t ito ay nasa tamang perspektibo lamang, Rey. Patuloy pa ring ginagampanan ni Pangulo ang kaniyang mahalagang tungkulin. Binibigyan diin ng Pangulo sa kaniyang pag-iikot sa lalawigan iyong kahalagahan na agad na matugunan at mabigyan ng solusyon ang pang-araw-araw na pangangailangan ng ating mga mamamayan.

SAMPANG: Secretary, correct me if I’m wrong, ang Pangulo rin po ang pinuno ng Liberal Party. So hindi siguro mailalagay sa question iyong kaniyang pag-ikot upang ikampanya iyong mga kandidato ng Liberal Party because besides being the President of the Republic of the Philippines, siya rin po ang pinuno ng Liberal Party ano po, Sec.?

SEC. COLOMA: Mas mahalaga diyan, Rey, iyong nauna kong ipinaliwanag na ang prayoridad ng Pangulo iyong pagtataguyod ng pambansang interes at iyong pagtugon sa mga pangangailangan ng ating mga mamamayan.

SAMPANG: Okay. Secretary, mayroon pong ikatlo at panghuling katanungan mula po sa ating Malacañang Press Corps. Ano po raw ang masasabi ng Malacañang sa pahayag ng China na isa raw pong ‘political arrogance’ o ‘legal prejudice’ ang pagkuwestiyon ng Pilipinas sa Beijing ukol sa kasong inihain sa Permanent Court of Arbitration sa The Hague, Secretary?

SEC. COLOMA: Malinaw na hindi lamang ang Pilipinas ang naniniwalang makatuwiran ang paghain ng petisyon sa Court of Arbitration sa The Hague. Sa pagtatapos ng ASEAN-US Special Summit sa California noong Pebrero 2016, isa sa mga pinagkasunduan sa deklarasyon ng lahat ng lider ng ASEAN kasama si Pangulong Obama ay nagsasaad ng sumusunod, and I quote, “Shared commitment to maintain peace, security and stability in the region, ensuring maritime security and safety including the rights of freedom of navigation and overflight and other lawful uses of the seas, and unimpeded lawful maritime commerce as described in the 1982 UN Convention on the Law of the Sea (UNCLOS), as well as non-militarization and self-restraint in the conduct of activities.”

Iyan din ang buod ng posisyon ng Pilipinas sa pagsusulong sa mapayapa at rules-based approach. Bilang bahagi ng international community, ang paghahain ng Pilipinas ng petisyon sa Permanent Court Arbitration ay isang matibay na pagpapatunay sa pagtataguyod ng nasabing prinsipyo. Dalawang linggo lamang ang nakararaan, dito rin sa buwang Abril 2016, sa pagpupulong ng mga G7 Foreign Ministers sa Hiroshima, Japan, ipinahayag ng mga Foreign Ministers ng Britain, Canada, France, Germany, Italy, Japan at Unites States ang kanilang malakas na pagtutol sa “intimidating, coercive or provocative unilateral actions that could alter the status quo and increase tensions” sa South China Sea o West Philippine Sea para sa atin. Idiniin din nila ang kahalagahan ng, and I quote, “Peaceful management and settlement of maritime disputes through applicable internationally recognized legal dispute settlement mechanisms, including arbitrations.”

Klaro na ang makatuwirang posisyon ng Pilipinas sa usaping ito ay kinakatigan at umaani pa ng suporta ng maraming bansa, at malayung-malayo doon sa ipinaparatang, Rey.

SAMPANG: Nagtataka lang ako, Secretary, ang China pa ang nagsabi na medyo ano daw tayo, medyo nagpe-pressure daw tayo sa kanila. Eh sa tingin po ng nakararami dito sa Pilipinas ay sila pa nga ho nagpe-pressure sa atin pagdating sa territorial dispute eh (Laughs).

SEC. COLOMA: Iyon na nga ang buod ng aking binanggit na pahayag ng mga G7 Foreign Ministers sapagka’t nagpahayag muli sila ng malakas na pagtutol sa kanilang binansagang “intimidating, coercive or provocative unilateral actions that could alter the status quo and increase tensions” patungkol sa South China Sea o West Philippine Sea.

SAMPANG: Opo. Secretary, that is the last question mula po sa ating mga kasamahan sa Malacañang Press Corps for today, not unless po, Secretary, mayroon pa ho kayong nais na iparating na mahahalagang impormasyon sa ating mga tagapakinig po?

SEC. COLOMA: Iyan na lamang ang ating pahayag sa ngayon at maraming salamat sa inyong lahat, Rey.

SAMPANG: Ang atin pong butihing Kalihim, Secretary Sonny Coloma ng Presidential Communications Operations Office.