SEC. COLOMA: Lampas pitong oras iyong ginawang pagdinig, Alan, at ako naging saksi doon dahil isa ako sa mga naimbitahan.
At sa buong kaganapan ay lalong naging klaro iyong malaking pagkukulang sa bahagi nung dating SAF Director Getulio Napeñas na naging sanhi ng mataas na bilang ng mga nasawi sa dalawang bagay, importante, Alan no. Una, iyong hindi pagsunod sa kautusan ni Pangulong Aquino na tiyakin iyong coordination sa AFP. Ikalawa, iyon ding mismong situational awareness niya at iyong demeanor — iyong kanyang pagkilos bilang commander nung operations — sa buong kaganapan, na kung saan naipakita na puwede naman sana niyang… dati nang naipakita, hindi naman doon sa kahapon, na puwede namang na-abort iyong operations ngunit hindi niya ito isinagawa. At lumabas din doon na sinolo ni General Napeñas iyong mga mahahalagang portions ng kanilang operasyon katulad na nung pagtukoy sa mga abort option at iyong contingency planning.
Kaya mainam na rin, Alan, na nailabas ang mga bagay na ito sa pagdinig kahapon para sa kaalaman ng ating mga mamamayan at para maging malinaw kung ano ang mga dapat na tahaking pagbabago para hindi na maulit ang nangyari sa Mamasapano.

ALAN: Sec, sa ibang usapin po. Mayroon pong inilabas ang Transparency International, iyon pong kanilang Corruption Perception Index o CPI para sa taong 2015 at sinasabi po dito na iyong Pilipinas dati ay nasa 85th naging number 95th daw po ngayon sa ratings, Sec. Sonny, sir?

SEC. COLOMA: Ito ang kauna-unahang pagkakataon na bumaba iyong rating natin at sa mas malapit na pagsusuri lumalabas na marami din namang mga tabla na score kaya hindi naman din ganoon kasama iyong pagbaba ng ating rating kung tutukuyin iyong mga pag-tabla ng mga ranking sa mga countries.
Pansinin natin, Alan, ang tinutukoy dito ay perception. Iyong perception, may kaibahan din naman iyon sa reyalidad at isang bagay na dapat nating unawain ano ba iyong mga perception na iyon. Pero para sa akin lang ang mas mahalaga dito ay iyong patuloy na determinasyon at patuloy na pagsisikap na patatagin iyong mga institusyon pampubliko natin, iyong pagtibayin iyong mga pagbabago sa aspeto ng pamamahala, iyong tinatawag nating good governance.
Nakapagtatag na tayo ng mga istruktura at imprastraktura para sa transparency at public accountability — iyong Citizens Charter, iyong Performance Based Bonus, iyong pinalalagay sa mga website ng pamahalaan, iyong mga mahalagang transakyon, iyong paggamit ng pondo ng bayan. Iyan ay mga napakahalagang mga hakbang sa pagpapatatag ng mabuting pamamahala sa ating bansa na siyang magiging batayan para pawiin ang koraspyon. Dahil iyong korapsyon ay sumisira sa imahe ng bansa, iyong korapsyon din ang nagbabawas sa pondo na ginagamit sa pagpapabuti ng kabuhayan ng mga mamamayan.
Kaya kahit na bumaba iyong rating at nagbago iyong perception, hindi natitinag iyong determinasyon ng ating pamahalaan na magtatag ng isang matibay na pundasyon para sa mabuting pamamahala at para matupad iyong battle cry natin — “kung walang corrupt, walang mahirap.”

ALAN: Sec, dito naman po sa pagdalaw ni Japanese Emperor Akihito at Empress Michiko dito sa Pilipinas. We understand that this is very significant considering kasabay nito iyong paggunita rin ng ika-animnapong taong anibersaryo ng diplomatic relations sa pagitan po ng Pilipinas at ng Japan. Ano pong mga updates din dito po sa mga pagpupulong nina Pangulong Noy at Emperor Akihito, Sec. Sonny, sir?

SEC. COLOMA: Isang mahalagang aspeto ng pagdalaw ni Emperor Akihito at Empress Michiko ay iyong pagpapatibay sa people to people relations ng mga mamamayan ng bansang Japan at ng ating bansa, Alan. Ang bansang Japan ay tumatayo ngayon bilang isang strategic partner ng Pilipinas at konkreto iyong manipestasyon ng kanilang pakikipagkaibigan sa atin sa pamamagitan ng sila ang pinakamalaking Official Development Assistance benefactor natin. At sa maraming aspeto ng ating ekonomiya sila ay tumutulong sa pag unlad ng ating bansa. At iyon ngang mismong Emperor at Empress ay simbolo ng matibay ng pagkakaibigan ng Pilipinas at Japan.

ALAN: Opo. Well, Secretary Coloma, sir, muli salamat po ng marami for the updates from the Palace, sir.

SEC. COLOMA: Maraming salamat at magandang umaga, Alan.